El díi 23 d'ochobre n'Uviéu tendrá llugar una manifestación pola nuesa república qu'entamará a les 20:00 frente a la Estación del Norte. Como organización nacionaliega nos sofitamos la convocatoria del Ensame pola República Asturiana.

Esti ye'l suo manifiestu:

1) Asturies vive nuna situación antidemocrática dafechu, na que los valores republicanos y los derechos sociales y nacionales vienen siendo negaos y xabazmente reprimíos per parte del estáu español, formáu en Reinu.

2) Una de les espresiones sociales más significatives d'esti fechu ye la denomación institucional d'Asturies como "Principado", figura política impuesta a esti Pueblu qu'afala'l vasallaxe y el servilismu a una institución arcaica, elitista y antidemocrática cola qu'Asturies y les asturianes y asturianos nada ganamos nin tenemos nada que ver.

3) Oponémonos a cualquier tipu de réxime monárquicu, por ser ésti'l paradigma de la desigualdá social y la falta de derechos con impunidá llegal. Tampoco podemos escaecer que la designación del monarca español foi fecha durante'l franquismu, siendo ésti designáu y coronáu a deu directamente pol propiu dictador, ensin qu'entá viéremos enfotu dalu nesta institución predemocrática por pedir perdón tres cuarenta años de fascismu xenocida col beneplácitu del sistema llegal 'constitucional' actual.

4) Denunciamos el compromisu col capitalismu xabaz, asesín de tolos pueblos del mundu, que remanez de la monarquía española, siendo ésta garante de la defensa de les clases privilexaes y de la desigualdá económica, social y de derechos. Refugamos, tamién, les actitúes machistes, homófobes, represores y censores que surden dende la monarquía española, qu'afiten, una vegada más, el so orixe feudal y arcaicu, comportamientos mui estremaos a los que defendemos nosotres y nosotros.

5) Consideramos una humildación a Asturies la cellebración de los 'Premios Príncipe de Asturias', considerándolos una coartada pa 'llavar la cara' internacionalmente a la monarquía, faciéndola pasar por institución moderna y que respeta la cultura, visión mui alloñada d'una, muncho más cercana a la realidá, de 'familia de vividores a sueldu de toes y toos' que conocemos perbién y manipulando al traviés de los medios españolistes, al tiempu, la imaxe de la sociedá asturiana. Poro, nun podemos dexar de pidir la crítica pa los galardonaos por estos 'premios de pandereta', que faen el xuegu cómpliz a la monarquía española, nin dexar d'ablucar y protestar, tampoco, polos costes de les fartures 'reales' a cargu de los nuestros impuestos –nestos tiempos de crisis– , asina como de la situación d'estáu y ocupación militar y policial ostentoria que nel nuestru país se xenera con cualaquier 'visita' de los miembros d'esa familia 'real'.

6) Queremos afitar dende agora mesmo la necesidá d'articular y crear un movimientu republicanu asturianu que lluche pola lliberación d'esti país y refugue cualquier tipu d'opresión nacional y social, como la que constitúi la monarquía española y cualquier réxime monárquicu. Asina, namás entendemos un cambiu de modelu de país pa construyir una República Socialista asturiana onde los valores republicanos d'igualdá, llibertá, accesu a la cultura y llaicismu seyan los finxos que caltengan la nuestra llucha por una Asturies xusta y un mundu de pueblos llibres.

¡¡PUXA LA REPÚBLICA ASTURIANA, SOCIALISTA Y SOBERANA!!

Ya entama'l nuevu cursu y con ello la represión. Esti añu entama pa los estudiantes de primeru de bachiller la tema de quedase a 7ª hora pa dar relixón (o pa quedase castigáu por nun estudiala).

La primera protesta organizala el Sindicatu d'Estudiantes, sofitada pol Frenti Estudiantil, faciendo dos fuelgues; una pal dia 22 d'ochobre y otra pal 13 de payares. Equí teneis la convocatoria: En Castellán

El Frenti Estudiantil nun ye mui dau a sofitar al SE, ya que reconoz l'Estáu Español ya nun emplega la nuesa llingua nacional (como faen en Euskal Herria, Catalunya...) nos panfletos ya nos cartelos, pero al ser una convocatoria escontra Bolonia ya la illesia merezse que la sofitemos ya que ye una causa xusta.